ඉන්දීය රුපියලත් දැවැන්ත කඩාවැටීමක් අභියස

ඉහළ ආර්ථික වර්ධනයක් සහ අඩු උද්ධමනයක් සහිතව ඉන්දියාව භුක්ති විඳිමින් සිටි ස්වර්ණමය ආර්ථික පසුබිම, මැදපෙරදිග ඇවිළී යන යුද්ධයත් සමඟින් මුළුමනින්ම කණපිට පෙරළී තිබේ.

මෙහි දරුණුතම බලපෑම එල්ල වී ඇත්තේ ඉන්දීය රුපියලට වන අතර, පසුගිය වසර තුළදී අමෙරිකානු ඩොලරයට සාපේක්ෂව එහි අගය 10% කට ආසන්න ප්‍රමාණයකින් පහත වැටී වාර්තාගත අවම අගයක් සටහන් කර ඇත.

ඉන්දීය මහ බැංකුව (RBI) මැදිහත් වී මෙම කඩාවැටීම තාවකාලිකව පාලනය කළද, ගෝලීය මූල්‍ය පර්යේෂණ ආයතනයක් වන බර්න්ස්ටයින් (Bernstein) අනතුරු අඟවන්නේ 2026 වසර පුරාවටම මෙම යුද්ධය පැවතුණහොත් රුපියලේ අගය ඩොලරයකට රුපියල් 110 සීමාව ද පසුකරමින් විනාශකාරී කඩාවැටීමකට ලක්විය හැකි බවයි.

වර්ධන වේගය අඩාල වීම

මෙම මුදල් අර්බුදය හේතුවෙන් පාරිභෝගික භාණ්ඩ මිල ඉහළ යාම, ආයතනික ලාභ අඩුවීම සහ රජයේ හිඟය පුළුල් වීම සිදුවෙමින් පවතී. විදේශ ආයෝජන ඉවත් කරගැනීම නිසා මේ වසරේ ආරම්භයේ සිට ඉන්දීය කොටස් වෙළෙඳපොළ දර්ශක 12% කින් පමණ පහත වැටී ඇත. ආනයන සහ ප්‍රවාහන වියදම් ඉහළ යාම මෙන්ම ගල්ෆ් කලාපයේ වෙසෙන මිලියන 10ක් පමණ වන ඉන්දියානුවන්ගෙන් ලැබෙන ප්‍රේෂණ අඩුවීම ද ආර්ථිකයට ප්‍රබල පහරක් එල්ල කර තිබේ.

මේ හේතුවෙන් 2026-27 මූල්‍ය වර්ෂය සඳහා 7% ක් ලෙස පුරෝකථනය කර තිබූ දළ දේශීය නිෂ්පාදිතයේ (GDP) වර්ධනය 1% කින් පමණ කපා හැරීමට සිදුවනු ඇති අතර, ලොව සිව්වන විශාලතම ආර්ථිකය බවට පත්වීමේ ඉන්දියාවේ සිහිනය ද තවදුරටත් කල් යනු ඇත.

එකතැන පල්වීමේ අවදානම

ලෝකයේ තෙවන විශාලතම බොරතෙල් ආනයනකරුවා වන ඉන්දියාව, සිය ස්වභාවික ගෑස් අවශ්‍යතාවයෙන් 60% ක්, LPG අවශ්‍යතාවයෙන් 90% කට වඩා සහ පොහොර අවශ්‍යතාවයෙන් 25% ක්ම ආනයනය කරන්නේ මැදපෙරදිග කලාපයෙනි. සැපයුම් අවහිර වීම මත මේ වන විටත් ඉන්දියාව තුළ උග්‍ර ගෑස් හිඟයක් නිර්මාණය වී ඇති අතර, ඒ හේතුවෙන් ආපනශාලා සහ හෝටල් වැසී යාම ආරම්භ වී තිබේ.

හිටපු ප්‍රධාන ආර්ථික උපදේශක අරවින්ද් සුබ්‍රමනියන් පෙන්වා දෙන්නේ ඉන්දියාව දැවැන්ත “උද්ධමනකාරී එකතැන පල්වීමක” (stagflationary shock) අවදානමකට මුහුණ දී ඇති බවයි. කොවිඩ් සමයේ මෙන්, ගෑස් හිඟය හේතුවෙන් ප්‍රධාන නගරවල සිටි සංක්‍රමණික ශ්‍රමිකයින් යළි ගම්බිම් බලා යාම ආරම්භ වී ඇති අතර, මෙය ඉදිරියේදී දැඩි ශ්‍රම හිඟයකට සහ වැටුප් ඉහළ යාමකට ද හේතු විය හැක.

ඉන්දීය රජයේ උපායමාර්ග

මෙම අර්බුදයට මුහුණ දීම සඳහා ඩොලර් බිලියන 6.2 ක “ආර්ථික ස්ථායීකරණ අරමුදලක්” පිහිටුවීමට ඉන්දීය රජය යෝජනා කර ඇති අතර, ආහාර සහ පොහොර සහනාධාර සඳහා අමතර වියදම් ද අනුමත කර තිබේ. යුද්ධය අවසන් වන කාලය පිළිබඳ නිශ්චිතභාවයක් නොමැති බැවින්, ඉන්දීය මහ බැංකුව (RBI) පොලී අනුපාත වෙනස් නොකර “බලා සිටීමේ” උපායමාර්ගයක් අනුගමනය කරනු ඇතැයි අපේක්ෂා කෙරේ.

දුර්වල රුපියල හේතුවෙන් අපනයන තරඟකාරීත්වය ඉහළ යාම සහ පවතින විදේශ විනිමය සංචිතය ඉන්දියාවට යම් අස්වැසිල්ලක් ගෙන දුන්නද, අනාගතයේදී මෙවැනි කම්පනයන්ගෙන් මිදීම සඳහා පුනර්ජනනීය බලශක්තිය වෙත කඩිනමින් මාරුවීම සහ බලශක්ති සංචිත විවිධාංගීකරණය කිරීමේ දිගුකාලීන උපායමාර්ගයක අවශ්‍යතාව විචාරකයින් විසින් දැඩිව අවධාරණය කරනු ලබයි.

| lankalokaya

මුලාශ්‍රය :

India's high-growth economy gets a Middle East oil shock