නීතිය යුක්තිය සාධාරණත්වය වෙනුවෙන් තමාට ජම්පරය ඇඳීමට සිදු වුවහොත් ඊට සුදානම් යැයි කතානායකවරයා පවසා තිබේ.
උදය ගම්මන්පිල පාර්ලිමේන්තු මන්ත්‍රීවරයා මාධ්‍ය සාකච්ඡාවකදී දැක්වූ අදහසක් ගෙන හැර දක්වමින් පාර්ලිමේන්තු මන්ත්‍රී එස්.එම්. මරික්කාර් ඊයේ (27) පාර්ලිමේන්තුවේදී කළ ප්‍රකාශයකට පිළිතුරු දුන් කතානායක කරූ ජයසුරිය මේ බව සඳහන් කර ඇත.
“උදය ගම්මන්පිල මාධ්‍ය සාකච්ඡා තියලා කියනවා කතානායකට ජම්පරය ස්ථිරයි කියලා. කූට ලේඛන සකස් කර ඇති බව කිව්වා. පාර්ලිමේන්තු හැන්සාඩ් නිල වශයෙන් නිකුත් කිරීම කූඨ ලේඛන සකස් කිරීමක් කියනවා නම් පරීක්ෂණයක් කළ යුතුයි. මන්ත්‍රීවරුන් ලෙස අපිටත් ඇත්ත දැන ගන්න අවශ්‍යයි. ඔබතුමා ඇත්තටම කූට ලේඛන හැදුවද කියලා පරීක්ෂා කරන්න ඕනා,” යනුවෙන් පාර්ලිමේන්තු මන්ත්‍රී එස්. එම්. මරික්කාර් ප්‍රකාශ කළේ ය.
ඊට පිළිතුරු දෙමින් කතානායකවරයා ප්‍රකාශ කළේ සිය ජිවිත කාලය තුලදී කූඨ ලේඛන සාදා නොමැති බවත් එවැනි චෝදනා තිබේ නම් ඕනෑම පරීක්ෂණයකට මුහුණ දීමට තමා සුදානම් බවත් ය.
“යුක්තිය වෙනුවෙන් ජම්පර් අදින්න වුණොත් ඊට මම ලෑස්තියි. මම ජීවිතේට කූඨ වැඩක් කරලා නෑ. ඕනෑම පරීක්ෂණයකට මම සූදානම්. කතානාය හොඳ නැත්නම් හෙටම යෝජනාවක් ගෙනත් කතානායක ඉවත් කරන්න.”
එසේම තමන්ගේ අනුරූ පඹයන් ලෙස සකසා පිළිස්සීම පසුගිය දිනවලදී සිදුවී ඇති බවත් වස් දොස් යාමට පඹයන් පිළිස්සීම හොඳ බවත් කතානායක කරූ ජයසුරිය පැවසුවේ ය.