පාර්ලිමේන්තුවේ බහුතර මතයට කන් දී අප දේශය මෙම ව්‍යසනයෙන් මුදවා ගැනීමට වහා ක්‍රියා කරන ලෙස සියලු පුරවැසියන් හා නූපන් අනාගත පරපුර වෙනුවෙන් ජනාධිපතිවරයාගෙන් ගෞරවයෙන් ආයාචනා කරන බව කතානායකවරයා ප්‍රකාශ කරයි.
කතානායකවරයා විවේචනය කරමින් ජනපති මෛත්‍රිපාල සිරිසේන ඊයේ (14) යොමු කරන ලද ලිපියට පිළිතුරු වශයෙන් ලිපියක් යොමු කරමින් අද (15) දින කතානායකවරයා මේ බව පවසා තිබේ.
2015 ජනවාරි 8 වැනිදා මෛත්‍රිපාල සිරිසේන ජනපති පදවියටත් රනිල් වික්‍රමසිංහ අගමැති පදවියටත් පත්වුයේ එදා ජනයා ලබාදුන් වරමෙන් යැයි අමතකවීම කනගාටුවට කරුණක් බවත් එවක රජයේ සියලු දෙනාගේ කැමැත්තෙන් රනිල් වික්‍රමසිංහයන් වෙත අගමැති තනතුර ලබාදුන් නමුත් මෙවර අගමැති පදවිය වෙනස් වීමේදී එකඟතාවයක් හෝ පාර්ලිමේන්තු බහුතර අදහස සැලකිල්ලට නොගත් බවත් කතානායකවරයා සිය ලිපියෙහි සඳහන් කරයි.
එසේම පාර්ලිමේන්තු බහුතරය තමන් සතු නොවීම වටහා ගත් නව රජයේ මන්ත්‍රීවරු හැසිරුණු ආකාරය ඉතාමත් අශිෂ්ට බව කතානායකවරයා අවධාරණය කරයි.
“තමන්ට බහුතරයක් පෙන්වීමේ ශඛ්‍යතාවක් නොමැති බව අවබෝධ කරගත් නව රජයේ මැති ඇමැතිවරුන් ප්‍රජාතන්ත්‍රවාදී, පාර්ලිමේන්තු සම්ප්‍රදායන්ට නිගරු කරමින්, ස්ථාවර නියෝග පසෙකලා ක්‍රියා කළ ආකාරය ද, සභා ගර්භය මැදට පැමිණ සෙංකෝලය පැහැර ගැනීමට උත්සාහ කරමින් ඉතාමත් අශිෂ්ඨ පහත් වචන පාවිච්චි කරමින් හැසිරුණු ආකාරය ද ගරු මන්ත්‍රීතුමා යන ආමන්ත්‍රණයට කිසි ලෙසකින්වත් සුදුසු නොවේ,” යනුවෙන් කතානායක කරූ ජයසුරිය පවසයි.
ස්ථාවර නියෝග අනුව ඡන්ද විමසීමක් පැවැත්වීමට මන්ත්‍රීවරුන් හිතාමතා බාධා කළ අයුරු පාර්ලිමේන්තුවේ පටිගත කරන ලද සංයුක්ත තැටි නැරඹීමෙන් අවබෝධ කරගත හැකිවනු ඇතැයි ලිපියෙහි වැඩිදුරටත් සඳහන් ය.
