ව්‍යාජ ආණ්ඩුවේ අගමැතිධුරයට පත් කෙරුණු මහින්ද රාජපක්ෂ පාර්ලිමේන්තුවේ විශේෂ ප්‍රකාශයක් කළ පසු එහි දැඩි උණුසුම් වාතාවරණයක් හට ගැනුණි.
බහුතරයක් නොමැති බව පවසමින් කතානායකවරයා ඊයේ(14) දින කල් තැබූ පාර්ලිමේන්තුව අද (15) පෙරවරු 10 ට ආරම්භ කළ අතර එහි කටයුතු ආරම්භ වීමත් සමඟ කතානායකවරයා පාර්ලිමේන්තුවේ කතා කිරීමට මහින්ද රාජපක්ෂ මහතාට අවස්ථාව ලබාදුනි.
එම ප්‍රකාශයෙන් පසු “මහින්ද රාජපක්ෂ මහතා හා එතුමාගේ කතාව සම්බන්ධයෙන් විශ්වාසයක් නොමැති” බවත් නාමික ඡන්දයක් පැවැත්විය යුතු බවත් ලක්ෂ්මන් කිරිඇල්ල මන්ත්‍රීවරයා යෝජනා කළේය.
මහින්ද රාජපක්ෂ පිළ ඊට විරෝධය පළකරමින් ඝෝෂා කරන්නට පටන් ගැනීමත් සමඟ පාර්ලිමේන්තුව තුළ දැඩි උණුසුම්කාරී වාතාවරණයක් ඇතිවිය.
කතානායකවරයාගේ මේසය වටකරගත් මන්ත්‍රීවරුන්ගේ ඝෝෂාව හමුවේ සභාව පාලනය කිරීමට කතානායකවරයා කිහිප වරක් උත්සහ කළත් එය සාර්ථක නොවූ තැන සිය අසුනින් නැගිට ඉවත්ව ගියේ ය.
මේ වනවිට පාර්ලිමේන්තු කටයුතු තාවකාලිකව නවත්වා ඇත.