2018 ප්‍රශ්නවලට 2019 උත්තර
*ඉතින් කොහොමද ?
හොඳයි.
*සේවය කළ ආයතනයෙන් මිලියන හතරක් - එහෙමත් නැත්නම් ලක්ෂ හතළිහක් වංචා කළාද ?
ඒක, මඩ ප්‍රවෘත්තියක්වත් තර්කානුකූලව හදාගන්න බැරි පිරිසක විසින් නිර්මාණය කරන ලද පට්ටපල් බොරුවක්.
*විධායකය වෙත යොමු කරන ලද ලිපියක් පදනම් කරගනිමින් සමහර වෙබ් අඩවි එහෙම පළ කරලා තිබුනා?
ඔය කියන ඊනියා ලිපියේ පවා තිබෙන්නේ එවැනි මුදලක් ආයතනයට අහිමි කරා කියල. හැබැයි වෙබ් අඩවිවල ගියේ වංචා කරා කියල. දෙකම බොරු. වචනවලට අර්ථ තියෙනවා. අර්ථ විසින් ප්‍රවාද හදනු ලබනවා. මේවා භයානක වෙන්නේ අන්න ඒ නිසයි.
*එහෙමනම්, ඇත්ත මොකද්ද ?
තරගකාරී නාලිකාවක් ලෙස ගතානුගතික වැඩසටහන් ආර වෙනස් කරන්න අවශ්‍යව තිබ්බා. අභ්‍යන්තරව නිෂ්පාදනය කළ වැඩසටහන් වලින් වගේම බාහිරව මිලදී ගන්නා වැඩසටහන් වලිනුත් ඒ අරමුණ ජයගන්න වැඩ කළා. එම ඊනියා ලිපිය නිශ්චිත වැඩසටහන් තුනක් ගැන පවසනවා. ඒ වැඩසටහන් සඳහා ආයතනය ගෙවූ සම්පූර්ණ මුදල මිලියන හතරක් ලෙස එකතු කර, මට මඩක් ගහනවා. මා දන්නේ නැහැ ඒ වැඩසටහන් තුන මේකට ගාවගත්තේ මොන පදනමකින්ද කියල. කොහොම නමුත්, මෙහෙම හිතන්න. යම් වැඩසටහනක නිෂ්පාදන වියදමක් තියෙනවා. නිෂ්පාදන ආයතනය යම් ලාබ තීරුවක් තබාගන්නවා. නාලිකාවේ කවුරුන් හෝ වංචනිකව මුදලක් ලබාගන්නවා නම් ගතයුත්තේ අන්න ඒ තීරුවෙනුයි. ඒකයි මම කිව්වේ මේ මඩ, තර්කානුකූලව නිර්මාණශීලීව යමක් ගොතාගන්නවත් බැරි පිරිසක් එල්ල කළ මෝඩ දුර්වල ප්‍රහාරයක්. අනෙක් අතට අපේ වැරදි හොයල හොයල මුකුත් හොයාගන්න බැරි තැන, ටිකක් හරි ලොකු ඉලක්කමක් හදාගන්න ගත්ත හෙන අනුකම්පා සහගත උත්සහයක්.
*ඇයි එහෙනම් එහෙම එකකට උත්තර දෙන්නේ ?
සත්‍යය නොදන්නා කෙනෙක් නොමග යන එක වැලැක්වීම සහ ඔවුන්ගේ චෝදනාව පමණක් ඉතිහාසයේ ඉතිරිවන එක වළක්වා මගේ පිළිතුර සමාජගත කිරීම.
*බාහිරව වැඩසටහන් මිල දී ගත්තේ තමන්ගේම ආයතනයකින් ද ?
මා සතුව කිසිම රූපවාහිනී වැඩසටහන් නිෂ්පාදන ආයතනයක් නැහැ. එවැනි කිසිම ආයතනයක් සමග මගේ කිසිම සම්බන්ධයක් නැහැ.
*එම ආයතනයට බිරිඳ සම්බන්ධ බව කියවෙනවා ?
ඒකත් අර වගේම බොරුවක්. මගේ වෘත්තීය වගකීම්වලට නියමින් හෝ අනියමින් ඇය දායක කරගන්නේ නැහැ. එම නිෂ්පාදනවලට ඇගේ කිසිම සම්බන්ධයක් නැහැ. `පවුලේ නාලිකාව` තමන්ගේ පවුලේ නාලිකාව බවට පත්කරගත්ත උදවිය හිතනවා අපිත් එහෙමයි කියල.
*එම බාහිර ආයතන හිතවතුන්ගේ බව පැවසෙනවා ?
මුළින්ම කියනව මගේ කියල. ඒක බොරු බව තේරෙනවා. ඊළඟට කියනව බිරිඳගේ කියල. ඒකත් බොරුවක් බව හෙළිදරව් වෙනවා. ඊළඟට කියනව හිතවතුන්ගේ කියල. මෙහෙමයි, මේ ක්ෂේත්‍රයේ සියයට අසූවක් අනූවක් මා දන්නා කියන උදවිය. එය මගේ වරදක් නෙමෙයි නේද ?
*එම ලිපිය අනුව ඕවර් ද ෂෝල්ඩර්, මහාචාර්ය යව්වනය සහ සංචාරේ වැඩසටහන්වලට හිතවතුන්ගේ සම්බන්ධයක් තිබෙනවා?
කළින් කිව්වා වගේම බොහෝ වැඩසටහන් - ටෙලිනාට්‍ය ගෙනා අය මගේ හිතවතුන්. ඇත්තටම ඔය කියන ඒවා අතරින් සංචාරේ වැඩසටහන කාගේ නිෂ්පාදනයක්දැයි මා දන්නෙත් නැහැ. මගේ හිතවතුන් සම්බන්ධ ඔය ලිපියේ සඳහන් වී නොමැති තවත් වැඩසටහන් හා ටෙලිනාට්‍ය ඕන තරම් තිබෙනවා. උවමනානම් ඒ නම් ටිකත් දෙන්නම් ඔය ලැයිස්තුවට දාගන්න. එතකොට අර ඉලක්කම තව ලොකු කරගන්න පුළුවන්.
*වගකීම අවභාවිතා කරේ නැහැ කියලද මේ කියන්නේ ?
මම ඔබට සිත්ගන්නා සුළු විස්තරයක් කියන්නම්. ඔබ දන්නවද මේ ක්ෂේත්‍රයේ මගේ හිතවතුන් කී දෙනෙක් මා සමග අමනාප වෙලා තියෙනවද කියල ඔවුන්ගේ නිර්මාණ භාරනොගැනීම නිසා. ඔබ දන්නවද හිතවතුන් කී දෙනෙක් හිත රිද්දගෙන තියෙනවද කියල අවස්ථාවන් නොදීම නිසා. ඒ වගේ ම එසේ අමනාප නොවුණු ශ්‍රේෂ්ඨ මිනිස්සුත් ඉන්නවා. මට මේ ක්ෂේත්‍රයට එන්න අතහිත දුන්නු ආදරණීය මිනිස්සු - කුසලතාපූර්ණ අතිදක්ෂ මිනිස්සු ඉන්නවා. ඒත් කවදාවත් වගකීම අවභාවිතා කරලා ඔවුන්ට සළකන්න ගියේ නැහැ. ඔවුන් ඒවා බලාපොරොත්තු වුනෙත් නැහැ. ඒ විතරක් නෙමෙයි, මගේ පවුලේ සමීපතම ඥාතියෙක් මේ ක්ෂේත්‍රයේ වැඩකරනවා. ඔහු සම්මානයට පවා පාත්‍ර වී තිබෙනවා මේ නාලිකාවේම මා සේවයට යන්නට පෙර විකාශනය වූ ටෙලි නාට්‍යවලින්. හැබැයි, මා සේවය කරන කාල වකවානුව තුළ, ඔහු දායක වූ ටෙලි නාට්‍ය මා වැඩකළ නාලිකාවෙන් ප්‍රතික්ෂේප කළ බව ඔබ දන්නවාද ? ඔහු දායක වූ එක ටෙලි නාට්‍යයක් පූර්ව සමීක්ෂණ මණ්ඩලයෙන් ප්‍රතික්ෂේපිතව - අභියාචනා මණ්ඩලයෙනුත් ප්‍රතික්ෂේපිතව ඉවත් කෙරුනා. ඥාති සංග්‍රහ - මිත්‍ර සංග්‍රහ අපි ගාව නැහැ. හිතවත්කම්වලට නෑදෑකම්වලට අපි වැඩකරන්නේ නැහැ. එහෙම පුරුදු අයට හිතෙනවා අපිත් වැඩකරන්න ඇත්තේ එහෙම වෙන්නැති කියල.
*ඕවර් ද ෂෝල්ඩර් වැඩසටහනේ නිවේදකයා හැටියට ඒකටවත් සම්බන්ධයක් තිබ්බේ නැද්ද ?
එවකට සභාපතිවරයාගෙන් අවසර අරගෙන මම එය ඉදිරිපත් කළේ. ඒ විතරක් නෙවෙයි, එම වැඩසටහන සඳහා නිෂ්පාදන ආයතනයෙන් මට ගෙවන්නට එකඟ වූ මුදල, මා සේවය කළ ආයතනය වෙත තබාගන්නැයි මම ලිඛිතවම සභාපතිවරයාට දැන්වුවා. ඒ අනුව නිවේදකයා ලෙස මට හිමි මුදල සම්පූර්ණයෙන්ම හිමි වුනේ මා සේවය කළ නාලිකාවටයි. අන්න ඒකයි අපේ සම්ප්‍රදාය. ඕවර් ද ෂෝල්ඩර් සඳහා තිබ්බේ නිර්මාණශීලිත්වයේ සුහද සම්බන්ධය විතරයි.
*ටෙලිනාට්‍ය විකාශනය කරන්නත් සල්ලි ගත්තලු නේද ?
ටෙලිනාට්‍ය විකාශනය සඳහා මුල්‍යමය සහ මාංශමය අල්ලස් රාජධානියක් බවට පත්වෙලා තිබ්බ ආයතනයක් අපි එකතු වෙලා ශීලාචාර ආයතනයක් බවට පත්කලා. පරණ පුරුද්දට සමහර උදවිය අපේ කාමරවලට පෞද්ගලිකව ඇවිත් ඔබතුමාට මොනවද වෙන්න ඕන කියල රහසින් ඇහුවම, ``කණගාටුයි මහත්වරුනි පිළිගත් ක්‍රමවේදයෙන් බැහැරව වැඩසටහන් මිල දී ගන්නේ නැහැ`` කියල හඬනගා පවසලා අපි ඔවුන්ව හැරෙන තැපෑලෙන් පිටත් කළා. මේ ඇත්ත දන්න අය දන්නවා. ඔවුන් නිහඬව සිටීම ගැනත් කණගාටුවක් නැහැ. ඔය කටකතාවත් ඉලාස්ටික් ටෙලි නාට්‍ය අනන්තයට ඇදගෙන යන්න බැරිවුණු අයගේ හිතේ දුකට කියවෙන කවියක්.
*ආයතනයේ දක්ෂයන් ඉද්දී පිටින් වැඩසටහන් ගත්තෙ ඇයි ?
දක්ෂයන් වගේම අදක්ෂයනුත් ඉන්නවා. උදහරණයක් හැටියට රියැලිටි වැඩසටහන කළේ දක්ෂයෙක් නිසා අපිට පිටින් රියැලිටි වැඩසටහන් ගේන්න ඕන වුනේ නැහැ. දක්ෂයාට වැඩක් භාරදෙනකොට දේශපාලනය බැලුවෙ නැහැ. සමහර දක්ෂයන් අපේ දේශපාලනය සමග සමපාත නැති බව අපි දැනගෙන හිටියා. හැබැයි තැන දුන්නේ නිර්මාණශීලීත්වයට. ඒ වගේම, සමහර ගතානුගතික රටාවන් කඩන්න එළියෙන් අලුත් දේ ගේන්න වුණා. මකුළු දැල් තියෙන තැන් බලලා ඒවා කඩන්න කොස්සක් ගෙනාවම, මකුළු දැල් අස්සේ හැංගිලා හිටපු උදවියට රිදෙනවා. ඊට පස්සෙ කිය කිය යනවා අන්න කොස්සෙන් කොමිස් ගහනව කියල. හාස්‍යජනකයි.
* කවුද මකුළු දැල් අස්සේ හිටියේ ? මොනවද ඒගොල්ලෝ කරේ ?
කිසිදු කුසලතාවක් නොදැක්වූ මිනිස්සු හිටියා. එක උදාහරණයක් කියන්නම්. එක පුද්ගලයෙක් වැඩසටහන් අංශයේ දිගින් දිගටම අසාර්ථක වුනා. ඊට පස්සේ ඔහුව අංග රචනා (make up) අංශයට යොමු කෙරුවා. ඒ සම්බන්ධව කිසිදු කුසලතාවක් නැහැ කියල ඒ අංශයේ ප්‍රධානියා ලිඛිතවම ප්‍රතික්ෂේප කෙරුව. ඊට පස්සේ ඔහුව දැම්ම ප්‍රවර්ධන (promotion) අංශයට කොඩි කණුවක් හරි හිටවයිනෙ කියල. පව්. අහිංසක මිනිස්සු. පොහොට්ටු පාක්ෂිකයෙක්. තාම ඉන්නවා.
ඒ එක උදාහරණයක් විතරයි.
* උද්ඝෝෂණ වලදී සභාපතිවරිය සහ ප්‍රධාන විධායක නිලධාරියාට බරපතළ විරෝධයක් එල්ල වුනා නේද ?
මාධ්‍ය ආයතනයක නිර්මාණශීලීම විරෝධය හූ කීමද කියන්න මා දන්නේ නැහැ. තිලකා ජයසුන්දර කියන්නේ දෙස් විදෙස් අත්දැකීම් තිබෙන පරිපාලන සේවයේ ඉහළතම නිලධාරිනියක්. ඇය ඇගේ ශක්ති ප්‍රමාණයෙන් වෘත්තීයමය සේවයක් සළසන්න ඇපකැප වුනා. ඇගේ සේවය ලබාගන්න නම් විනයක් ශික්ෂණයක් තිබෙන ආයතනයක් වන්නට ඕනෑ. නැත්නම් එතුමියගේ වටිනා කාලය නාස්ති වෙනවා. චන්දන තිලකරත්න කියන්නේ අතිදක්ෂ නිර්මාණශීලී වැඩිහිටියෙක්. අපට පෙර පරම්පරාවේ ප්‍රවීණයෙක්. ඔහු කෙතරම් ආදරණීය ලෙස වැඩකටයුතු කෙරුවද කියන එක බහුතර සේවකයන් දන්නවා. ඒ කීර්ති රාවයන් හූ හඬකින් යටපත් කරන්න මාර අමාරුයි.
* උද්ඝෝෂකයන් කියන්නේ `අම්මව රැකගන්න` පෙරට ආව කියලයි ?
ඔය අම්මගෙ කතාව යට දේශපාලනයක් තියෙනවා. රට රටක් හැටියට තේරුම් ගන්න කැමති නැති උදවිය මේක `ලංකා මාතාව` කියල මුරුංග අත්තෙ තියනවා. රට අම්මට සමාන කර පණ දෙන්න හදන කට්ටිය තමයි රට කන්නෙ. ඒ වගේ තමයි මේකත්. රාජ්‍ය ආයතන කියන්නේ අම්මවත් තාත්තවත් නෙමෙයි කියල තේරුම් ගන්න වැඩිහිටි සිතීමක් තියෙන්න ඕන. අම්මගේ පර්ස් එක සුද්ද කරන - තාත්තගේ සාක්කුව සුද්ද කරන පුරුද්ද තියෙන අයට වැඩකරන ආයතනය පේන්නෙත් ඒ විදිහට. ``2015 ජනාධිපතිවරණයේදී එවකට ජනාධිපති මහින්ද රාජපක්ෂ මහතාට වාසි සහගත අන්දමින් ප්‍රචාරක කටයුතු සිදු කිරීම සඳහා ස්වාධීන රූපවාහිනිය නොමිලයේ යොදාගැනීම තුළින් රාජ්‍ය ආයතනයක් වූ එම රූපවාහිනියට රුපියල් එකොලොස් කෝටි විසිනව ලක්ෂ හාරදහස් හයසිය තිස් අටක (රු. 112,904,638) මුදලක් පාඩු සිදු කිරීම සහ එම ජනාධිපතිවරණයේම පොදු අපෙක්ෂක මෛත්‍රීපාල සිරිසේන මහතාගේ මැතිවරණ ප්‍රවර්ධන ප්‍රචාරක දැන්වීම් සඳහා සත්‍ය ගුවන්කාල සම්මත මුදල මෙන් දෙගුණයක් අයකර එකම මැතිවරණයකදී සමාන අපේක්ෂකයන් දෙදෙනෙකුගෙන් එක් අයෙකුට අසමාන ලෙස සැලකීමකට බඳුන් කර වැඩි පුර මුදලක් ස්වාධීන රූපවාහිනී පාලන අධිකාරිය මගින් ලබාගැනීමට කටයුතු කිරීම`` ගැන බරපතල වංචා, දූෂණ, රාජ්‍ය සම්පත්, වරප්‍රසාද, බලය සහ අධිකාරිය අනිසි ලෙස භාවිතා කිරීම සම්බන්ධයෙන් විමර්ශනය කිරීම සඳහා වූ ජනාධිපති පරීක්ෂණ කොමිෂන් සභාව වාර්තාවක් දීල තියෙනවා. ආයතනයක් අම්මට සමාන කරනවානම් අම්මට සිරි වෙන දේවල් තමයි එව්වා. අපට නම් දෙමව්පියෝ කියන්නේ දෙමව්පියෝ ආයතන කියන්නේ ආයතන.
*යූ එන් පී කාරයෙක් හැටියට ආයතනය තුළ දේශපාලන පළිගැනීම් කෙරුවද ?
මරු ප්‍රශ්නයක්. මම වැඩ භාර අරන් ගිහින් ඒ පක්ෂයට අදාළ සේවක සංගමයේ උදවිය එක්ක කරපු පළමු සාකච්ඡාවේදීම කිව්වා ``මම යුඑන්පී කාරයෙක් නෙමෙයි`` කියල. මේ ඊයේ පෙරේදා ආරංචි වුනා එදා මම ඒ කිව්ව දේට ඔවුන් තාමත් අමනාපයෙන් ඉන්නෙ කියල. දේශපාලන පළිගැනීම් කරා ද කියල අප සිටින කාලයේ උසස්වීම් පවා ලැබූ රදලියගොඩ පවුලේ සාමාජිකයාගෙන් අහන්න. කොහොම නමුත් ඒවා එහෙම වෙනකොට, අපේ දේශපාලන සගයන් නම්, මාව යුඑන්පීකාරයෙක් කෙරුව. ඕව ඔහොම තමයි.
*ඒත් පත්වීම දේශපාලන පත්වීමක් ? පත්කළේ එජාප ආණ්ඩුවේ ඇමති මංගල සමරවීර ?
හරියට හරි. හැබැයි මංගල සමරවීර මට කිව්වෙ නැහැ ඇතුළට ගිහිල්ල එයාගේ පක්ෂෙ දේශපාලනය කරන්න කියල. ජාතිවාදයට ආගම්වාදයට මිත්‍යාවට එරෙහිව මාධ්‍ය වැඩක් කරන්න කිව්වම, අන්න ඒකටයි මම කැමති වුනේ. එකඟතාව එච්චරයි. ඒ අනුව, එක අකුරක් එක වචනයක් එක නාදයක් ජාතිවාදය ආගම්වාදය මිත්‍යාව වෙනුවෙන් විකාශනය නොකරන්න අපි පරෙස්සම් වුනා.
* ඔය මොනවා කෙරුවත් `රේටින්ග්ස්` තිබ්බේ නැහැනේ ?
ඔව්නේ. ඉතින් හරිනේ. ලංකාවේ රේටින්ග්ස් තියෙන්නේ ජාතිවාදයට ආගම්වාදයට හරියන විදිහට වැඩසටහන් හැදුවොත් නේ. ඒ රටාවෙන් මිදිච්ච ගමන් ඒ ප්‍රේක්ෂකයා වෙන වෙන නාලිකා හොයාගෙන ගියා. මේ තත්ත්වය සම්පූර්ණයෙන්ම දේශපාලනිකයි. අනෙක් අතට කකුලෙන් ඇදීම් දහසක් එක්ක උඩුගම් බලා පීනන්නට පටන් අරගෙන තිබුනේ. මධ්‍යස්ථ ප්‍රේක්ෂකයා සාක්ෂි.
* සමහරු අධ්‍යාපන සුදුසුකම් ප්‍රශ්න කරනවා ?
ඔව් මම දැක්කා. දැනුම අවබෝධය සහ නිර්මාණශීලී භාවය වෙත යන එකම පාලම සහතික නොවෙයි. තියෙන සහතික ටික රාමු කරලා පාරට පේන්න එල්ලලත් නැහැ. අධ්‍යාපනය කියන්නේ උද්දච්ඡ කමට හේතුවක් නම් ඒ අධ්‍යාපන සහතික එපා.
* මේ චෝදනා වලට නීතිමය පියවර ගන්නවද ?
කාට එරෙහිව පියවර ගන්නද ? තමන්ගේ වැඩසටහනේ ට්‍රේලර් එක හදාගන්න බැරි අහිංසකයන්ට එරෙහිවද ? උඩින් එන ඕඩරේ ක්‍රියාත්මක කරන පල්ලෙහා මිනිස්සුන්ට එරෙහිවද ? ඊළඟ මැතිවරණයකින් ඡන්දෙ ඉල්ලන්න ආශාවෙන් වොයිස් කට් දෙන තරුණයන්ට එරෙහිවද ? ඒ ඊනියා චෝදනා පත්‍ර පළ කරන උඩින් මිතුරු යටින් හතුරු වෙබ් මිතුරන්ට එරෙහිවද ? ඒවාට උපදෙස් දෙස දාර්ශනික සහෝදරවරුන්ට එරෙහිවද ? ඒවා ඉන්බොක්ස් හරහා සංසරණය කරන කුහකයන්ට එරෙහිවද ? මුළින්ම එහෙම පියවර ගන්න හිතුනා. ඒත් ඒවටත් සල්ලි එපැයි. මේ වෙලාවේ නඩු කියන්න සල්ලි නැහැ. ඊළඟ මාසේ ගෙවල් කුලිය හොයාගන්න එක ඊට වඩා ප්‍රමුඛ කාර්යයක්.
* දැන් මේක දේශපාලන ප්‍රශ්නයක් වෙලා ?
අපොයි ඔව්. සැලැස්ම පැහැදිලියි. ඉහළ මාලයේ දේශපාලන වේදනාව පහළ මාලයේ කඩාකප්පල්කාරීත්වයක් දක්වා වර්ධනය කරලා `තත්ත්වය සමනය කිරීම පිණිස පවරා ගැනීමක්` වෙත යන්න අවශ්‍ය කරන `පස` සකස් කරමින් තිබෙනවා.
* ආපහු එහෙ වැඩට යනවද ?
ඒ පරිච්ඡේදය අවසන් බවත්, අපේ `වැඩේ` ඇත්තේ වික්‍රමසිංහපුර කඳවුරක නොව එයින් එළියේ බවත් අපි කිව්වේ පහුගිය ඔක්තෝබරයේමයි.
* ඊළඟට ?
උගත් පාඩම් පොකුරක් තියෙනවා. අලුත් දේවල් ගැන සිතමින් ඉන්නවා. දැන් තමයි `වැඩ` ඇරඹෙන්නේ.!
ස්තූතියි !