මෙරට පුරවැසියන්ගේ ගෞරවය ආරක්ෂා කිරීමේ අපේක්ෂාවෙන් මානසික රෝගී ආඥාපනත හරහා ජනාධිපති මෛත්‍රිපාල සිරිසේනගේ මානසික සෞඛ්‍ය මට්ටම යහපත් ද යන්න විමසා බැලීමට අවශ්‍ය කටයුතු සිදු කරන්නැයි පොලිස්පතිවරයාට නියෝග කරන මෙන් ඉල්ලා අද (10) දින අභියාචනාධිකරණය වෙත පැමිණිල්ලක් ඉදිරිපත් කර තිබේ.
සමාජ ක්‍රියාකාරිනි තක්ෂිලා ජයවර්ධනගේ දැනුම්දීම මත නීතිඥ සිසිර කුමාර විසින් මෙම පැමිණිල්ල ගොනු කර ඇත.
ජනාධිපතිවරයාගේ ලේ ඥාතියකු උමතු රෝගයකට ප්‍රතිකාර ගෙන තිබීම සහ ජනාධිපති සිරිසේනට ද ඒ අනුව නිධන්ගත උමතු රෝගයක් තිබීමේ හැකියාව, ඥාතියාගේ උමතු රෝගය පිළිබඳ චතුරිකා සිරිසේන ලියු "ජනාධිපති තාත්තා" කෘතියේ ඇතුළත්ව තිබීම, ග්‍රාමීය සමාජ පසුබිමක් ඇති සිරිසේන ජනාධිපතිට පවතින දේශපාලන අර්බුදය හමුවේ ඊට මුහුණදීමට තරම් මානසික සුවතාවක් ඇතිද යන්න පිළිබඳ සැකය සහ ජනාධිපති සිරිසේනට මානසික රෝගයක් ඇති බවට ජනතාව අතර මතයක් පැවතීම, සිය ළඟම සහ බලපෑම් සහගත තනතුරක් වූ ජනාධිපති කාර්ය මණ්ඩල ප්‍රධානියා අල්ලස් ගනුදෙනුවකදී අත්අඩංගුවට පත්වීම සහ ඒ සඳහා එවකට අගමැති රනිල් වික්‍රමසිංහ මැදිහත්වූ බවට සැක කරමින් ඔහු සම්බන්ධව ඇතිව තිබෙන මානසික අසමතුලිතතාව රටේ දේශපාලන අස්ථාවරත්වයට මුලිකවී ඇති බවත් මෙම පැමිණිල්ලේ අන්තර්ගතයට ඇතුළත්ව ඇතැයි වැඩිදුරටත් වාර්තා වේ.