මෙවර සංචාරක සම්මාන උළලේ ප්‍රධාන ආරාධිත අමුත්තා ලෙස ජනාධිපති මෛත්‍රිපාල සිරිසේන සහභාගී වන බැවින් උළෙල වර්ජනය කිරීමට එම කර්මාන්තයේ නියුතු ආයතන රැසක් තීරණය කර තිබේ.
රට තුල දේශපාලන අර්බුදයක් නිර්මාණය කිරීමට රුකුල් දීම නිසා සංචාරක කර්මාන්තය සම්පුර්ණයෙන්ම පාහේ කඩා වැටි ඇති බවත් ඊට ජනාධිපතිවරයා සම්පුර්ණයෙන්ම වගකිව යුතු බවත් පවසන ඔවුන් හෙට (06) දිනයේ කොළඹ ෂැන්ග්‍රිලා හෝටලයේ දී පැවැත්වීමට නියමිත සම්මාන උළෙලේ ආරාධිත අමුත්තා ලෙස ශ්‍රී ලංකා සංචාරක සංවර්ධන අධිකාරිය ජනාධිපතිවරයාට ආරාධනා කිරීම සම්බන්ධයෙන් සිය අසතුට පල කර ඇත.
යම් හෙයකින් මෙම සම්මාන උළලේ ප්‍රධාන ආරාධිතයා ලෙස ජනාධිපතිවරයා සහභාගී වුවහොත් ඔහු අතින් සම්මාන ලබා ගැනීම ප්‍රතික්ෂේප කිරීමට තීරණය කර සිටින බව එම ආයතන වැඩි දුරටත් සඳහන් කර සිටියි.
රටේ පවතින දේශපාලන අර්බුදය නිසා මේ වනවිට සංචාරක කර්මාන්තය සම්පුර්ණයෙන්ම පාහේ බිඳ වැටි ඇත.
සංචාරකයන් බහුලව ලංකාවට පැමිණෙන කාල සීමාව තුල බොහෝ සංචාරකයින් සිය සංචාර අවලංගු කර ඇති බැවින් මෙම ක්ෂේත්‍රයේ නියුතු 300,000 අධික පිරිසක් පිඩාවට පත්ව ඇති බව වාර්තා වේ.