ජනාධිපති මෛත්‍රීපාල සිරිසේන මහතා පසුගිය සිකුරාදා (නොවැම්බර් 09) පාර්ලිමේන්තුව විසුරුවා හරිමින් නිකුත් කළ ගැසට් නිවේදනය ක්‍රියාත්මක කිරීම අත්හිටුවමින් ශ්‍රේෂ්ඨාධිකරණය අතුරු නියෝගයක් නිකුත් කිරීමත් සමග අගමැති මහින්ද රාජපක්ෂ මහතා සිය ධුරයෙන් ඉල්ලා අස්වීමට තීරණය කර ඇතැයි 'පොහොට්ටු පක්ෂයේ' අභ්‍යන්තර ආරංචිමාර්ග පවසයි.
මේ මොහොතේ පැවැත්වෙන හදිසි කැබිනට් රැස්වීමේදී ඒ සම්බන්ධයෙන් තීරණයක් ගැනීමට නියමිත බව එම ආරංචි මාර්ග වැඩිදුරටත් කියා සිටියි.
මේ අතර එජාප නායක රනිල් වික්‍රමසිංහ මහතා පවසන්නේ, පාර්ලිමේන්තුව හෙට (14) දිනයේදි නැවත රැස්වන බවයි. තමන් හෙට දිනයේදී පාර්ලිමේන්තු බහුතරය පෙන්වීමට සූදානම් බවද ඔහු සදහන් කරයි.
වික්‍රමසිංහ මහතා මේ බව කියා සිටියේ අරලියගහ මන්දිරයේදි මාධ්‍ය අමතමිනි.