පක්ෂග්‍රාහී යැයි කතානායක වෙත ඇඟිල්ල දිගු කරන මෛත්‍රිපාල සිරිසේන ජනාධිපතිතුමා, රටක ජනාධිපති වශයෙන් තමන් මධ්‍යස්තව කටයුතු කළ යුතු බව අමතක කර ඇතැයි මෙරට ප්‍රවීන ලේඛකයෙක් පවසයි.
පාර්ලිමේන්තුව විසිරවීමට මුල් වූ බවට ජනාධිපතිවරයා විසින් දැක්වූ කරුණු දෙකක් පිළිබඳ අදහස් දක්වමින් 12 සඳුදා ජයතිලක කම්මැල්ලවීරයන් මේ බව සඳහන් කළේය.
“පපරේ බෑන්ඩ් ගහගෙන කලිසම ඔලුවේ ඔතාගෙන යට ජංගියෙන් ආපු පිරිසට එතුමා පැවසුවා 113 හදලා ඉවරයි කියලා. රටේ ජනාධිපති කියනවා එක පක්ෂයක් වෙනුවෙන් 113 ක් තමන් හැදුවයි කියලා. කතානායකගේ මධ්‍යස්තභාවය ගැන විතරයි එතුමා කතා කරන්නේ. රටක ජනාධිපතිවරයෙක් වූ පසු මධ්‍යස්තව කටයුතු කළ යුතුයි කියලා එතුමාට මතක නැහැ,” යනුවෙන් ශ්‍රී ලංකා පදනම් ආයතනයේ දී පැවැත්වුණු ප්‍රජාතන්ත්‍රවාදය වෙනුවෙන් විද්වත් පෙළගැස්ම කතිකාව අමතමින් ඔහු පැවසුවේ ය.
“අඩි 6 ක් යටට යවන්න බලාගෙන හිටපු මිනිහව මහ රෑ හොරෙන් අගමැති කළේ කතානායක නෙවෙයි. එසේ කිරීමෙන් තමයි අර්බුදය නිර්මාණය වුණේ. අපිම පත් කරපු ජනාධිපතිවරයා මේ තරම් නරක තැනකට ඇද වැටුනේ ඇයි කියලා අද රටම කතා වෙනවා.”
එසේම මන්ත්‍රීවරු කෝටි ගණන් වලට විකිණීම සම්බන්ධයෙන් ජනාධිපතිවරයා පවසන දෑ සත්‍යක් බව ජයතිලක කම්මැල්ලවීරයන් පවසයි.
“මන්ත්‍රීවරු කෝටි 50 ට 60 ට විකිණෙන්න, මිලදී ගන්න සුදානමක් රටේ ඇති වෙලා තියෙන කරුණ ජනාධිපතිවරයා සඳහන් කරනවා. කෝටි 50 ට මන්ත්‍රීන් විකුණන්න හැදුවා.... විකුණනකොට විකුනුම්කරුවෙක් ඉන්න ඕන, ගැනුම්කරුවෙක් ඉන්න ඕන. ජනාධිපතිතුමාගේ ප්‍රධාන චෝදනාව එල්ල වෙන්නේ එක්සත් ජාතික පක්ෂයට. එතකොට ගැනුම්කරුවා කවුද?ගැනුම්කරුවා එතුමාගේ පක්ෂේ අයනේ. ගැනුම්කරුවා තමයි සල්ලි දෙන්නේ. දැන් මේක ඇත්ත. මොකද ජනාධිපතිතුමා හොඳටම දන්නවා කවුද කෝටි ගණන් වලට මන්ත්‍රීවරු ගන්න කතා කෙරුවෙ කියලා. ‘රංගේ ඔයා එනවා නේද? අදම එන්න.. පරක්කු වැඩියි. ආවේ නැතිනම් පසු තැවෙන්න වෙයි.’ ඊට පස්සේ කියනවා ජනාධිපතිතුමාත් ඔයාට කතා කළා කියලා. ඒ කියන්නේ එයත් ඉන්නවා ගැනුම්කරුවා හැටියට. තමන් දන්නවා කෝටි ගණන් වලට මන්ත්‍රීවරු ගන්න හැදුවා කියන එක. ඒ නිසා එතුමා කියන දේ ඇත්ත.”