දේශමාමක හා අවංක ශ්‍රී ලාංකිකයෙක් විදියට රටේ පවතින කණගාටුදායක දේශපාලන අර්බුදය හමුවේ තමාට පිරිනමන ලද දේශමාන්‍ය පදක්කම හා සහතිකය ආපසු ලබා දෙන බව ආචාර්ය දේවනේසන් නේසයියා පවසා තිබේ.
ඔහු 7 බදාදා ජනාධිපති සිරිසේන වෙත ලිපියක් යවමින් මේ බව දන්වා ඇත.
ශ්‍රී ලංකා සිවිල් සේවයේ කීර්තිමත් නිළධාරියෙකු වන දේවනේසන් නේසයියා 1959 සිට 2017 දක්වා කළ සේවය වෙනුවෙන් ඔහුට මෙම පදක්කම ජනාධිපති සිරිසේන විසින් පිරි නමා තිබුණි.
වසර 70ක ප්‍රජාතන්ත්‍රවාදය ඉතාම අමනෝඥ ලෙස බිඳ දැමීම හේතුකොටගෙන තමා තුළ හට ගත් අප්‍රසාදය නිසා, 2017 මාර්තු මාසයේ පිරි නමන ලද ගෞරව සම්මානය තවදුරටත් තම සන්තකයේ තබා ගැනීමට ඔහු අකමැත්ත පළ කර තිබේ.
මේ වන විට විදේශගතව සිටින තමා ශ්‍රී ලංකාවට පැමිණි විගස සිය පදක්කම හා සහතිකය ජනාධිපති සිරිසේනට ලබා දීමට කටයුතු කරන බව එම ලිපියේ සඳහන් කර ඇත.