මහින්ද රාජපක්ෂ මහතා පසුගිය ජනාධිපතිවරණයේදී තම ප්‍රචාරක කටයුතු වෙනුවෙන් චීනයෙන් මුදල් ලබාගත් බවට ඔප්පු කිරීමට ඕනෑම විවාදකට ජනතා විමුක්ති පෙරමුණ සූදානම් බවට තමන් මහින්ද රාජපක්ෂ මහතාට අභියෝග කරන බව ජවිපෙ නායක අනුර දිසානායක මහතා අවධාරණය කරයි.
අනුර දිසානායක මහතා මේ බව අවධාරණය කර සිටියේ “රට රකින, රට හනද, ජනතාවාදී පාලනයක්” යන තේමාව යටතේ රට පුරා පවත්වනු ලබන ජන හමු දසදහසට සමගාමීව ඊයේ (21) පස්වරුවේ නොච්චියාගම කරඹෑව ප්‍රදේශයේ පැවති ජන හමුවකට එක්වෙමිනි.
පසුගියදා පාර්ලිමේන්තුවේදී පැවති විවාදයට මහින්ද රාජපක්ෂ මහතා සහභාගී වී, තමන් චීනයෙන් මුදල් ලබා නොගත් බව ඔප්පු කර පෙන්නාවි යැයි තමන් බලාපොරොත්තු වුන නමුත් මහින්ද රාජපක්ෂ මහතා එම විවාදය මග හැරිය බවත් එහිදී අනුර දිසානායක මහතා එහිදී සඳහන් කළේ ය.
“පෙරේදා පාර්ලිමේන්තුවේ විවාදයක් තිබ්බ. මොකද්ද විවාදය? රුපියල් ලක්ෂ 11,000කට සමාන මුදලක් චීන සමාගමකින් මහින්ද මහත්තයට දීල. අපි බලාපොරොත්තු වුනා මහින්ද මහත්තය ඇවිල්ල ඒකට පිළිතුරු දෙයි කියලා. ඕගොල්ලො දකින්න ඇති අපි චෙක්පත් එක්ක, චෙක්පත් අංක, චෙක් මාරු කරපු අය, අරලියගහ මන්දිරයට ගිහිල්ලා බාරදීපු විදිහ, මේ ඔක්කොමත් අපි පෙන්නුව. දැන් මහින්ද මහත්තයා සුද්ධවන්තයෙක්නම් පාර්ලිමේන්තුවට ඇවිල්ල උත්තරයක් දෙන්න එපැයි, නැහැ මම සල්ලි ගත්තේ නැහැ කියලා. මහින්ද මහත්තය විතරක් නෙමෙයි නාමල් ආවෙත් නැහැ. චමල් ආවෙත් නැහැ. නිකන් මේ පන්සල්වල ගිහිල්ලා වෙන වෙන කතා කියනවා.
මම නැවතත් කියනවා, මහින්ද මහත්තයා පාර්ලිමේන්තුවේ විවාදයට සහභාගී වුනේ නැතත් මම දැන් අභියෝග කරනවා එළියේ හරි ඕනෑම විවාදයකට චීනයෙන් සල්ලි ගත්තු බව ඔප්පු කරන්න ජනතා විමුක්ති පෙරමුණේ අපි සූදානම්.” යැයි ඒ මහතා වැඩිදුරටත් පැවසීය.