අපරාධකරුවන් සම්බන්ධයෙන් ද නීතිය හා සාධාරණත්වය ඉෂ්ඨ විය යුතු බව මුදල් හා ජනමාධ්‍ය අමාත්‍ය මංගල සමරවීර මහතා පවසයි.
අපරාධ කල්ලි සාමාජිකයකු පොලිස්‌ වෙඩි පහරින් ඝාතනය වීම සම්බන්ධයෙන් සිය ට්‌විටර් ගිණුමේ සටහනක්‌ තබමින් අමාත්‍යවරයා මේ බව ප්‍රකාශ කර තිබේ.
පසුගියදා මාතර නගරයේ ස්‌වර්ණාභරණ අලෙවි සලක්‌ කොල්ලකෑමට පැමිණි පිරිසක්‌ සහ පොලිස්‌ නිලධාරීන් අතර ඇතිවූ වෙඩි හුවමාරුවකදී පොලිස්‌ නිලධාරියකු මියගිය අතර කොල්ලකරුවෝ පොලිස්‌ අත්අඩංගුවට පත්වූහ. එලෙස අත්අඩංගුවට පත්වූ කොල්ල කණ්‌ඩායමේ ප්‍රධානියා පෙරේදා (23 දා) රාත්‍රියේ පොලිසියට අත්බෝම්බ ප්‍රහාරයක්‌ එල්ල කිරීමට උත්සහ දැරීමේදී පොලිසිය එල්ල කළ වෙඩි පහරකින් මිය ගියේය.
අදාළ සිද්ධිය සම්බන්ධයෙන් සිය ට්‌විටර් ගිණුමේ සටහනක්‌ තබමින් මංගල සමරවීර අමාත්‍යවරයා සඳහන් කර ඇත්තේ රාජකාරියේ නිරත පොලිස්‌ කොස්‌තාපල්වරයකු කොල්ලකරුවකුගේ වෙඩි පහරින් මිය යැම අදාළ සිද්ධිය සම්බන්ධයෙන් අත්අඩංගුවට ගත් සැකකරුවකු ඝාතනය කිරීම තුළින් සාධාරණීකරණය කළ නොහැකි බවයි.
වර්තමානයේ ක්‍රියාත්මක වන්නේ යහපාලනයක්‌ මිස යම පාලනයක්‌ නොවන බවද මංගල සමරවීර අමාත්‍යවරයාගේ ට්‌විටර් පණිවුඩයේ සඳහන් වේ.
