සෑම වසරකම මැයි 18 වැනිදා දෙමළ ජාතියේ සංහාර දිනයක් ලෙස ප්‍රකාශයට පත්කළ යුතු බව පසුගිය 10 වැනිදා පැවති උතුරු පළාත් සභා සැසිවාරයේදී උතුරු පළාත් සභාවේ ළමා හා කාන්තා කටයුතු පිළිබඳ ඇමතිනී ආනන්දි ශෂිධරන් පවසා තිබූ අතර එළඹෙන මැයි 18 වෙනිදා මුලතිව්, වෙල්ලමුල්ලිවයික්කාල් කේන්ද්‍ර කරගනිමින් උතුරේදී මියගිය පිරිස් සැමරීමට ද කටයුතු සූදානම් කර ඇත.
(15) රජයේ ප්‍රවෘත්ති දෙපාර්තමේන්තු ශ්‍රවණාගාරයේදී පැවති කැබිනට් මාධ්‍ය හමුවේදී මේ සම්බන්ධයෙන් මාධ්‍යවේදියෙකු විමසූ ප්‍රශ්නයට පිළිතුරු දෙමින් අමාත්‍ය රාජිත සේනාරත්න මහතා පැවසුවේ, ‘‘නෑ ඒක ප්‍රශ්නයක් නෑනේ. දැන් මෙච්චර කල් ජවිපෙ එක සැමරුවේ තමන්ගේ විරු සමරුව. ‘‘ යන්නයි.
මැයි 18 වැනිදා ජන සංහාර දිනයක් ලෙස ප්‍රකාශයට පත්කිරීම සම්බන්ධයෙන් උතුරෙන් නැගෙන ඉල්ලීම් ගැන නැවත වරක් අදාළ මාධ්‍යවේදියා විමසා සිටි අතර ඊට පිළිතුරු දුන් අමාත්‍යවරයා ‘‘ඒ කියන්නේ ඔබතුමාට ප්‍රශ්නේ තියෙන්නේ මේ දෙමළ මිනිස්සු මැරුණු එකනේ. උතුරේ මැරුණේ තමිල්නාඩුවේ කොහේ හරි ඉන්න කට්ටියද ? අපේම මිනිස්සුනේ මැරුණේ. මේ පැත්තෙන් මැරුණෙත් අපේ දරුවෝ. ඒ පැත්තෙන් මැරුණෙත් දරුවෝ. මේක ඇතුළේ තිබුණේ ප්‍රශ්නයක්. මේක ඇතුළේ තිබුණේ සිවිල් යුද්ධයක්. නැතුව පිටරටත් එක්ක ආක්‍රමණය කරලා නෙමෙයි. දැන් මේක පෙන්නන්න හදන්නේ හරියට පිටරට ආක්‍රමණිකයෙක්ව පැරැද්දුවා වගේ. ‘‘ යනුවෙන් පවසා සිටියේය.