උතුරු නැගෙනහිර පන්සල් තැනීම තහනම් කරන ලෙස ඇතැම් මාධ්‍ය වාර්තා කළ පුවත් සත්‍යයෙන් තොර බව ද්‍රවිඩ ජාතික සන්ධානයේ පාර්ලිමේන්තු මන්ත්‍රී එම්.ඒ. සුමන්තිරන් මහතා සඳහන් කරයි. නිවේදනයක් නිකුත් කරමින් ඔහු පවසන්නේ තමා මාධ්‍ය සාකච්ඡාවකදී කළ ප්‍රකාශයක් විකෘති කරමින් මෙසේ පළකොට ඇති බවයි.
2018 මැයි 7 වන දින
දිවයින ඉරිදා සංග්‍රහයේ මුල් පිටුවේ පළ කර ඇති ලිපිය හා සබැඳේ
2018 මැයි මස 6 වන ඉරුදින දිවයින ඉරිදා සංග්‍රහයේ මුල් පිටුවේ දැක්වෙන, ”උතුරු නැගෙනහිර පන්සල් තැනීම තහනම් කරන්න” ලෙස මම විසින් සඳහන් කළ බව කියැවෙන පුවත සම්පූර්ණ අසත්‍ය බව මෙයින් සඳහන් කරමි. ද්‍රවිඩ සන්ධානය වෙනුවෙන් මාධ්‍ය සාකච්ඡාවකදී මා විසින් ප්‍රකාශ කළ කරුණු විකෘති කොට දක්වමින් බෞද්ධ ජනතාව කෝපයට පත් කිරීමට මෙමගින් උත්සාහ දරා ඇත.
මාධ්‍ය සාකච්ඡාවකදී අසනු ලැබූ ප්‍රශ්නයකට පිළිතුරු දෙමින්, ”බෞද්ධ ප්‍රජාව ජීවත් නොවන ප්‍රදේශයන්හි බුදු පිළිම ඉදි කිරීම තේරුමක් නොමැති බවත් මෙවැනි ප්‍රදේශ වලින් ඉදිකොට තිබුණු බුදු පිළිම ඉවත් කොට ඇති බවත් ඊට අමතරව පාර්ලිමේන්තුවේදී මේ සම්බන්ධව වාර්තාවන්ද අප විසින් ඉදිරිපත් කොට ඇති බවත් මා විසින් සඳහන් කළෙමි. එබැවින් මෙලෙස අසත්‍යය කරුණු පළ කරමින් ජනතාව අතර ගැටුම් ඇතිකිරීමට තැත් කිරීම හේතුවෙන් මෙම පුවත් පතට එරෙහිව නීතිමය ක්‍රියා මාර්ග ගැනීමට මම බලාපොරොත්තු වෙමි.