කොළඹ, එස්.එස්.සී. ක්රීඩාංගණයේදී පැවැති මාධ්ය හමුවකදී ශ්රී ලංකා ක්රිකට් තරගාවලි කමිටුවේ සභාපති නලින් අපොන්සො විසින් දේශීය ක්රිකට් ව්යුහයේ ඉදිරි සංශෝධන පිළිබඳව කරුණු අනාවරණය කරන ලදී.
ශ්රී ලංකාවේ දේශීය ක්රිකට් ක්රීඩාවේ ගුණාත්මකභාවය සහ තරගකාරිත්වය ඉහළ නැංවීම සඳහා මීළඟ තරග වාරයේ සිට නව ශ්රේණිගත කිරීමේ ක්රමවේදයක් හඳුන්වා දීමට ශ්රී ලංකා ක්රිකට් ආයතනය තීරණය කර ඇත. ඒ අනුව ප්රධාන ලීගය (Major League), ප්රධාන විස්සයි20 සහ ප්රධාන ඕවර 50 යන අංශ තුනේම දක්ෂතා සැලකිල්ලට ගනිමින් ක්රීඩා සමාජ 1 සිට 14 දක්වා ශ්රේණිගත කෙරේ.
උසස්වීම් සහ පහළ දැමීම් (Promotion & Relegation)
නව ක්රමවේදය යටතේ ශ්රේණිගත කිරීම්වල පහළම ස්ථානය ගන්නා කණ්ඩායම "ටියර් බී" (Tier B) අංශය දක්වා පහළට දැමෙන (Relegate) අතර, "ටියර් බී" ශූරයන් ප්රධාන තරගාවලිය සඳහා උසස් කරනු ලබයි.
මෙම තීරණයට හේතුව පැහැදිලි කරමින් නලින් අපොන්සො මහතා කියා සිටියේ, දක්ෂතම ක්රීඩකයින් ශෛලීන් තුනේම රඳවා ගැනීමට ක්රීඩා සමාජ උනන්දු කරවීම මෙහි අරමුණ බවයි. විශේෂයෙන්ම තෙදින තරගාවලිය නිම වීමෙන් පසු ක්රීඩකයින් විදෙස් ලීගයන් සඳහා යාම නිසා සීමිත ඕවර තරගාවලීන්හි තරගකාරිත්වය අඩු වීම පාලනය කිරීම මෙහි අපේක්ෂාවයි.
සංඛ්යානමය වර්ධනය සහ තාක්ෂණික වෙනස්කම්
පසුගිය 2024-25 වාරයට සාපේක්ෂව 2025-26 වාරයේදී ක්රීඩා විලාශයේ කැපී පෙනෙන වර්ධනයක් සිදුව ඇති බව සංඛ්යාලේඛන මගින් පෙන්වා දෙන ලදී.
ශ්රී ලංකා ක්රිකට් ආයතනයේ සෘජු අධීක්ෂණය යටතේ මධ්යස්ථ ක්රීඩාංගණවල තණතීරු සකස් කිරීම නිසා පිතිකරුවන්ට මෙන්ම වේග පන්දු යවන්නන්ට ද වඩාත් හිතකර වටපිටාවක් නිර්මාණය වී ඇති බව මෙහිදී අවධාරණය කෙරිණි. දඟ පන්දු යවන්නන්ගේ කඩුලු ලබා ගැනීමේ ප්රතිශතය පහළ බැසීම මගින් පෙනී යන්නේ තණතීරු දඟ පන්දු යවන්නන්ට පමණක් සීමා නොවී සමබරව පවතින බවයි.
මූල්ය ආයෝජනය සහ ක්රීඩක ප්රතිලාභ
ප්රධාන සමාජ තෙදින තරගාවලියේ ක්රීඩා කරන එක් කණ්ඩායමක් වෙනුවෙන් ශ්රී ලංකා ක්රිකට් ආයතනය රුපියල් මිලියන 45ක මුදලක් වැය කරයි. ඉන් රුපියල් මිලියන 10ක් ක්රීඩකයින්ගේ තරග ගාස්තු සඳහා වෙන් කර ඇත. සාමාන්යයෙන් ක්රීඩකයෙකුට එක් තෙදින තරගයක් සඳහා රුපියල් 8,000ක මුදලක් හිමිවන අතර ජාතික සුපර් ලීගයට (NSL) තේරී පත්වන ක්රීඩකයින්ට මීට වඩා වැඩි ආදායමක් උපයා ගත හැකිය.
මෙම මාධ්ය හමුව සඳහා ශ්රී ලංකා ක්රිකට් තරගාවලි කමිටුවේ ලේකම් කසුන් ප්රනාන්දු, සාමාජික මාලන් ප්රනාන්දුපුල්ලේ සහ ජාතික ක්රිකට් මෙහෙයුම් ප්රධානී චින්තක එදිරිමාන්න යන මහත්වරු ද සහභාගි වූහ.
