ආණ්ඩුවට එරෙහිව මේ වන විට විපක්ෂය තුළ පුළුල් සහයෝගිතාවක් ඇති වී තිබේ. හිටපු ජනාධිපති රනිල් වික්‍රමසිංහ මහතා අත්අඩංගුවට ගැනීමෙන් පසුව මෙම තත්ත්වය දැඩි ලෙස වර්ධනය වී ඇති අතර මෙතෙක් දේශපාලන පසමිතුරු වූ බොහෝදෙනා මේ වන විට කොළඹ මාර්කස් ප්‍රනාන්දු මාවතේ පිහිටි අංක 30, විපක්ෂ නායක කාර්යාලයට පැමිණ ඉතා මිත්‍රත්වයකින් යුතුව ඉදිරි දේශපාලන කටයුතු පිළිබඳ සාකච්ඡා පවත්වමින් සිටී.
ඒ අනුව එවැනි විශේෂ සාකච්ඡා වට තුනක් විපක්ෂ නායක සජිත් ප්‍රේමදාස මහතාගේ ප්‍රධානත්වයෙන් මේ වන විට පවත්වා ඇති අතර ඊට සජබය, එජාපය, ශ්‍රීලනිපය ඇතුළු පාර්ශ්ව ගණනාවක් මෙන්ම සිවිල් සංවිධාන රැසක නියෝජිතයෝ එක්ව සිටියහ.
මෙම විපක්ෂ සහයෝගිතාව සම්බන්ධයෙන් ඉදිරි ක්‍රියාමාර්ග ගැනීමට අදාළ මාර්ග සිතියමක් සෑදීම සඳහා පාර්ලිමේන්තු මන්ත්‍රීවරුන් වන කබීර් හෂීම්, නලින් බණ්ඩාර, දයාසිරි ජයසේකර යන මහත්වරුන් වෙත භාර කර ඇත.
කෙසේවෙතත් මෙම සාකච්ඡා සඳහා ශ්‍රී ලංකා පොදුජන පෙරමුණේ සහභාගිත්වය ඉතා අවම වශයෙන් ලැබී ඇති අතර එජාපයට හිතවත් තිනියාවල පාලිත හිමි, ස්වාධීන මන්ත්‍රී රාමනාදන් අර්චුනා මහතාගේ ද සහාය හිමි වී තිබේ.
මෙම සහයෝගිතාව ඉදිරියට ගෙනයෑමට ලබන 05දා තවත් සාකච්ඡා වටයක් පැවැත්වෙන බව සජබ ජ්‍යෙෂ්ඨ ප්‍රකාශකයකු පැවසීය