ඉන්දුනීසියාවේ ජකර්තා නුවරදී අත්අඩංගුවට ගත් සංවිධානාත්මක අපරාධකරුවන් මෙරටට රැගෙන ඒම සඳහා තවත් විශේෂ කණ්ඩායමක් ශ්‍රී ලංකාවෙන් පිටත් කර හැරීමට තීරණය කර තිබෙනවා. පොලිසියේ ජ්‍යේෂ්ඨ ප්‍රකාශකයෙකු පැවසුවේ දැනට ඉන්දුනීසියාවේ සිටින මෙරට පොලිස් කණ්ඩායමට සහය වීම සඳහා මෙම පිරිස පිටත් කර හැරීමට නියමිත බවයි.
මෙම සංවිධානාත්මක අපරාධකරුවන් මෙරටට රැගෙන ඒමේ කටයුතු තරමක් සංකීර්ණ බැවින් ඊට සහය ලබා දීම අදාළ කණ්ඩායමේ ප්‍රධාන අරමුණක් වන බවයි ඔහු පැවසුවේ. කෙසේවෙතත් ඔවුන් මෙරටට රැගෙන ඒමේ රාජ්‍ය තාන්ත්‍රික කටයුතු මේ වන විටත් ආරම්භ වී ඇති බව පොලිසියේ ජ්‍යේෂ්ඨ ප්‍රකාශකයා වැඩිදුරටත් පැවසුවා.
මෙරට විශේෂ පොලිස් කණ්ඩායමක් සහ ඉන්දුනීසියානු පොලිස් කණ්ඩායමක් එක්ව සිදුකළ මෙහෙයුමකදී මෙලෙස අත්අඩංගුවට ගෙන තිබුණේ සංවිධානාත්මක අපරාධකරුවන් වන කෙහෙල්බද්දර පද්මේ, කමාන්ඩෝ සලින්ත, පානදුරේ නිලංග, බැකෝ සමන්, තැඹිලි ලහිරු, බැකෝ සමන්ගේ බිරිඳ සහ කුඩා දරුවෙකුයි.
කෙසේවෙතත් මෙම පිරිස සමග අත්අඩංගුවට ගත් කාන්තාව සහ කුඩා දරුවා ඊයේ පස්වරුවේ දිවයිනට රැගෙන එනු ලැබුවා.
කටුනායක ගුවන්තොටුපොළ නෙත් නිවුස් වාර්තාකරු පැවසුවේ ඉන්දුනීසියාවේ ජකර්තා නුවර සිට පැමිණි ගුවන් යානයකින් ඔවුන් දිවයිනට පැමිණ ඇති බවයි.
කෙහෙල්බද්දර පද්මේ ඇතුළු අපරාධ කල්ලි සාමාජිකයින් පිරිසක් පසුගියදා ජකර්තා නුවරදී අත්අඩංගුවට ගත් අතර එහිදී මෙම කාන්තාව සහ කුඩා දරුවාද අත්අඩංගුවට පත් වුණා. කෙසේවෙතත් එම කාන්තාවට බරපතළ අපරාධ චෝදනා එල්ල වී නොමැති බැවින් ඉන්දුනීසියානු බලධාරීන් විසින් කාන්තාව මෙරටට එවා ඇති බවයි වාර්තා වන්නේ. මේ අතර පාතාල ක්‍රියාවලට සම්බන්ධ බාල වයස්කාර දරුවන්ද දැන් හඳුනාගෙන ඇතැයි මහජන ආරක්‍ෂක අමාත්‍ය ආනන්ද විජේපාල මහතා පැවසුවා