කෙහෙල්බද්දර පද්මේ ඇතුළු ඇල්ලූ පාතාල කෙරුමන් රැගෙන ඒමට සැලසුමක් – පද්මේ සමග කොමාන්ඩෝ සලින්ත-බැකෝ සමන් – නිලංග ඇතුළු 6ක් කොටුවෙති

ඒ අතර බැකෝ සමන්ගේ බිරිඳත්
මේක පොලිසියේ ඉතිහාසගත මෙහෙයුමක්
පොලිස්පති


ඉන්දුනීසියාවේ ජාකර්තා නගරයේ අතිසුඛෝපභෝගී මහල් නිවාසයක සැඟවී සිටිය දී ශ්‍රී ලංකා පොලිසියේ විශේෂ කණ්ඩායමක් සහ එරට මෙට්‍රෝපොලිටන් පොලිසියේ ඒකාබද්ධ මෙහෙයුමකින් අත්අඩංගුවට ගත් මෙරට වර්තමාන පාතාලයේ ගෝර්ඩ් ෆාදර් ලෙස හඳුන්වන කෙහෙල්බද්දර පද්මේ ඇතුළු පාතාල අපරාධකරුවන් 05දෙනා විශේෂ ආරක්ෂාවක් යටතේ මෙරටට රැගෙන ඒමට නියමිතය.

මෙහිදී අත්අඩංගුවට ගත් පාතාල අපරාධකාරයන් අතර මන්දිනු පද්මසිරි පෙරේරා හෙවත් කෙහෙල්බද්දර පද්මේ, කොමාන්ඩෝ සලින්ත, බැකෝ සමන්, තැඹිලි ලහිරු, පානදුරේ නිලංග සිටින බව පොලිසිය පවසයි. මෙම අපරාධකරුවන් සමග සිටි බැකෝ සමන්ගේ බිරිඳ ද පොලිස් අත්අඩංගුවට ගෙන තිබේ.

ඉන්දුනීසියාවේ ජකර්තා නගරය වෙත ගොස් එහි සැඟව සිටි කෙහෙල්බද්දර පද්මේ ඇතුළු පාතාල මැරයන් පිරිස අත්අඩංගුවට ගනු ලැබුවේ පෑලියගොඩ අපරාධ කොට්ඨාසයේ අධ්‍යක්ෂ සහකාර පොලිස් අධිකාරි රොහාන් ඕලුගල සහ අපරාධ පරීක්ෂණ දෙපාර්තමේන්තුවේ සහකාර පොලිස් අධිකාරි ජයසුන්දර යන මහත්වරුන් දෙදෙනා විසිනි.



පෑලියගොඩ අපරාධ කොට්ඨාසයේ අධ්‍යක්ෂ සහකාර පොලිස් අධිකාරි රොහාන් ඕලුගල

මේ සම්බන්ධයෙන් දිවයින කළ විමසීමකදී පොලිස්පති ප්‍රියන්ත වීරසූරිය මහතා කියා සිටියේ ශ්‍රී ලංකා පොලිසියේ නිලධාරීන් කණ්ඩායමක් විදේශ රටකට ගොස් එරට මෙහෙයුමක් කර පාතාල අපරාධකරුවන් කණ්ඩායමක් අත්අඩංගුවට ගත් මුල්ම අවස්ථාව මෙය ලෙස ඉතිහාසගත වන බවයි.

මීට පෙර පාතාල මැරයන් මෙන්ම මත්ද්‍රව්‍ය ජාවාරම්කරුව මෙරටට රැගෙන ආවේ ඔවුන් ඒ ඒ රටවල පොලිස් කණ්ඩායම් විසින් අත්අඩංගුවට ගෙන රඳවාගෙන සිටීමෙන් අනතුරුවය.

එහෙත් කෙහෙල්බද්දර පද්මේ ඇතුළු පාතාල මැරයන් අත්අඩංගුවට ගැනීමේ මෙහෙයුම ශ්‍රී ලංකාවේ සිට සකස් කර ඊට ඉන්දුනීසියා පොලිසියේ ද සහාය ලබාගෙන ඔවුන් අල්ලා ගැනීමට කටයුතු කිරීම ඉතිහාස ගතවන ක්‍රියාවක් බව ප්‍රියන්ත වීරසූරිය මහතා පෙන්වා දෙයි.

පොලිස්පති ප්‍රියන්ත වීරසූරිය මහතාගේ මූලිකත්වයෙන් යුත් පොලිස් නිලධාරීන් කණ්ඩායමක් විසින් සති කීපයක් තිස්සේ මෙම මෙහෙයුම සකස් කර තිබිණි. මෙරට ඉන්දුනීසියානු තානාපති කාර්යාලයේ ද සහාය ඇතිව ඉන්දුනීසියානු පොලිසිය සහ එරට රජය සමග සාකච්ඡා කර මෙම පාතාල අපරාධකාරයන් අත්අඩංගුවට ගැනීමට සහාය ලබාගෙන ඇත.

ඉකුත් 23 වැනිදා මෙම මෙහෙයුමට සම්බන්ධවූ පොලිස් නිලධාරීන් දෙදෙනා ඉන්දුනිසියාවට ගොස් එරට පොලිස් බලධාරීන් සමග ඒකාබද්ධ වී පද්මේ ඇතුළු අපරාධකරුවන් සැඟවී සිටින ස්ථානය සොයාගෙන තිබේ.

පසුව පෙරේදා (27 වැනිදා) දහවල් පොලිස් නිලධාරීන් ජකර්තා නගරයේ මහල් නිවාසයක් වටලා පද්මේ අත්අඩංගුවට ගන්නට උත්සාහ කළ ද ඊට පැය 3කට පෙර ඔහු එම ස්ථානයෙන් පලා ගොස් තිබිණි.

ශ්‍රී ලංකා පොලිසියේ නිලධාරීන් පිරිසක් තමන් ඇල්ලීමට පැමිණෙන බවට ලැබී තිබූ තොරතුරක් මත පද්මේ එම ස්ථානයෙන් පලා ගොස් තිබිණි.

පසුව පොලිස්පති ප්‍රියන්ත වීරසූරිය මහතා ඉන්දුනීසියානු පොලිස් බලධාරීන් සමග සාකච්ඡා කර නැවත මෙහෙයුමක් ක්‍රියාත්මක කිරීමට කටයුතු කර තිබිණි.

ඒ අනුව රොහාන් ඕලුගල සහ ජයසුන්දර නිලධාරීන් දෙදෙනා ඉන්දුනීසියානු මෙට්‍රෝපොලිටන් පොලිසියේ නිලධාරීන් සමග ඒකාබද්ධවී ජකර්තා නගරයේ තවත් සුපිරි මහල් නිවාසයක් වටලා එහි සැඟවී සිටි කෙහෙල්බද්දර පද්මේ ඇතුළු පිරිස අත්අඩංගුවට ගන්නා ලදී.

පොලිසිය මුලින් විශ්වාස කරගෙන සිට ඇත්තේ මෙම මහල් නිවාසයේ කෙහෙල්බද්දර පද්මේ පමණක් සිටිනවා යැයි කියාය. එහෙත් පොලිසිය එම මහල් නිවාසය වටලද්දී පද්මේ සමග ඔහුගේ පාතාල කල්ලියේ දරුණු අපරාධකාරයන් සිව්දෙනකු සහ කාන්තාවක ද එහි සිට ඇත.

මොවුන් සියලුදෙනා එම නිවසට පැමිණ වෙනත් ස්ථානයකට පලා යෑමට සූදානම් වෙමින් සිටි බව පොලිසිය පවසයි.

මෙහිදී අත්අඩංගුවට ගත් පද්මේ ඇතුළු පාතාල මැරයන් ඉන්දුනීසියා පොලිසියේ දැඩි ආරක්ෂාව යටතේ රඳවා සිටින අතර ඔවුන් මෙරටට ගෙන ඒමට අවශ්‍ය ක්‍රියාමාර්ග ඊයේ වනවිට ගෙන තිබිණි.

ඉන්දුනිසියාවේ ශ්‍රී ලංකා තානාපති කාර්යාලයේ සහාය ද ඊට නොවඩුව ලැබී තිබිණි.

මෙම මෙහෙයුම ක්‍රියාත්මක කිරීම සඳහා අපරාධ පරීක්ෂණ දෙපාර්තමේන්තුවේ ජ්‍යෙෂ්ඨ නියෝජ්‍ය පොලිස්පති අසංක කරවිට එහි අධ්‍යක්ෂ ජ්‍යෙෂ්ඨ පොලිස් අධිකාරි ශානි අබේසේකර මහත්වරුන් පූර්ණ සහාය ලබා දී තිබිණි.

මන්දිනු පද්මසිරි පෙරේරා හෙවත් කෙහෙල්බද්දර පද්මේ මෙරට පාතාලයේ වර්තමාන ගෝර්ට් ෆාදර් ලෙස හඳුන්වනු ලබයි. පාතාල නායක ගනේමුල්ලේ සංජීව අලුත්කඩේ අධිකරණ ශාලාව තුළදී වෙඩි තබා ඝාතනය කරනු ලැබුවේ පද්මේගේ නියෝග මත බව පසුව හෙළි විය.

ඊට අමතරව තවත් මිනිස් ඝාතන රැසක් සම්බන්ධයෙන් මෙන්ම මහා පරිමාණ මත්ද්‍රව්‍ය ජාවාරම් සම්බන්ධයෙන් පද්මේට එරෙහිව චෝදනා එල්ල වී තිබෙන බව පොලිසිය පවසයි.

ගම්පහ ඔස්මන් නමැති ව්‍යාපාරිකයා අවස්ථා තුනක දී වඩි තබා ඝාතනය කිරීමට පාතාල කණ්ඩායම් එවා තිබුණේ පද්මේ විසින්ය. පලා ගිය යුද හමුදා කොමාන්ඩෝ සෙබළුන් 18 දෙනෙක් සම්බන්ධ කරගෙන පාතාල කුලී ඝාතනයන් කල්ලියක් බිහිකර ගෙන සිටියේ ද පද්මේ විසින්ය.

කෙහෙල්බද්දර පද්මේගේ කල්ලියේ මහ මොළකරු ලෙස සැලකෙන කොමාන්ඩෝ සලින්ත නමැත්තා අත්අඩංගුවට ගත් පිරිස අතර සිටියි. පද්මේ විසින් ක්‍රියාත්මක කරන මිනිස් ඝාතන සියල්ල සඳහා සැලසුම් සකස් කර ඇත්තේ කොමාන්ඩෝ සලින්ත විසින්ය.

මෙහිදී අත්අඩංගුවේ සිටින බැකෝ සමන් සහ තැඹිලි ලහිරු යන පාතාල මැරයන් දෙදෙනා මිද්දෙණිය ප්‍රදේශයේ දී සිය දරුවා සමග යතුරු පැදියෙන් යමින් සිටි කජ්ජා ඝාතනය මෙහෙයවූ අපරාධ කාරයන්ය. එම ප්‍රහාරයෙන් කජ්ජාගේ දියණිය හා පුත්‍රයා ද එම ස්ථානයේම ඝාතනයට ලක්වූහ.

ඉන්දුනීසියා පොලිස් අත්අඩංගුවේ පසුවන මෙම පාතාල අපරාධකාරයන් පස්දෙනා සහ කාන්තාව එරට පොලිසියේ විශේෂ ආරක්ෂාවක් යටතේ අද දිනයේ ශ්‍රී ලංකාවට ගෙන ඒමට අවශ්‍ය සියලු කටයුතු සූදානම් කර ඇති බව පොලිස් ආරංචි මාර්ග පැවසීය.

සැකකරුවන් මෙරටට ගෙන ආපසු අපරාධ පරීක්ෂණ දෙපාර්තම්න්තුව වෙත භාර දී ඔවුන්ට එරෙහි නීතිමය කටයුතු ක්‍රියාත්මක කිරීමට නියමිතය.