විපක්ෂයේ දේශපාලන පක්ෂ එක්ව වේදිකාවක් සකස් කරන්නේ අත්දැකීම් බහුල පාර්ලිමේන්තුව නියෝජනය කළ අය ද ඇතුළුව පැරණි තනතුරු දරපු අයගේ අදහස් ඉදිරිපත් කිරීම වෙනුවෙන් මිස ආණ්ඩුව පෙරළීමට නොවන බව පොදුජන එක්සත් පෙරමුණේ නායක, හිටපු ඇමැති අනුර ප්‍රියදර්ශන යාපා මහතා පෙරේදා (16) ප්‍රකාශ කළේය.
පොදුජන එක්සත් පෙරමුණ යටතේ මෙවර පළාත් පාලන මැතිවරණයට ඉදිරිපත් වී තේරීපත් වූ නියෝජිතයන් වෙනුවෙන් ඉකුත් 16 වැනිදා ශ්‍රී ලංකා නිදහස් පක්ෂ මූලස්ථානයේදී පැවති වැඩමුළුවකට සහභාගි වීමෙන් පසු මාධ්‍ය හමුවේ අදහස් දැක්වූ අනුර ප්‍රියදර්ශන යාපා මහතා මේ බව සඳහන් කළේය.
මෙහිදී වැඩිදුරටත් හිටපු ඇමැති අනුර ප්‍රියදර්ශන යාපා මහතා මෙසේද කීවේය.
“රටක පවත්නා ආණ්ඩුවක් පෙරළීම සම්බන්ධයෙන් තීරණය කරන්නේ ආණ්ඩුවක ක්‍රියාකාරීත්වය අනුවයි. රටක ආර්ථික තත්ත්වය යහපත් නම් ආණ්ඩුවකට දිගුකාලීන ගමන් මඟක් පවතිනවා.
තුනෙන් දෙකක බලයක් ලබමින් බලයට පත්වූ හිටපු ජනාධිපති ගෝඨාභය රාජපක්ෂ මහතාට වසර දෙකක් ගතවන විට ප්‍රශ්න රැසකට මුහුණදීමට සිදුවුණා. අපි ප්‍රජාතන්ත්‍රවාදී විපක්ෂයක් ලෙස සියලු දේශපාලන පක්ෂ සමඟින් කටයුතු කරනවා.
කාලාන්තරයක් තිස්සේ ප්‍රමාද පළාත් සභා මැතිවරණය පවත්වන්න හොඳ කාලය මේ බව මම විශ්වාස කරනවා. ඒකෙන් ආණ්ඩුවේ ජනප්‍රියත්වය වගේම විරුද්ධ පක්ෂයේ අයගේ ජනප්‍රියත්වය පිළිබඳවත් දැනගන්න අවස්ථාවක් ලැබෙනවා. ජනතාවට මීළඟ පාර්ලිමේන්තු මැතිවරණයත්, ප්‍රාදේශීය සභා මැතිවරණයත් අතර කාලයේදී තමන්ගේ ජනමතය ප්‍රකාශ කරන්න අවස්ථාවක් ලැබෙනවා. ආණ්ඩුව පළාත් සභා මැතිවරණය ගැන කතා කරන්නේම නැහැ. ඒකෙන් පේන්නේ ඒ අය ටිකක් තැතිගැන්මෙන් ඉන්න බවයි.
එකතු වෙන්නේ ආණ්ඩුව පෙරළන්න නොවෙයි -හිටපු ඇමැති අනුර ප්‍රියදර්ශන යාපා
